Act 28 | NdeIBE | STEP | Sathi sesiphephile safika emhlabathini, sezwa ukuthi isihlenge leso sasithiwa yiMalitha.

Acts 28

Emhlabathini EMalitha

1 Sathi sesiphephile safika emhlabathini, sezwa ukuthi isihlenge leso sasithiwa yiMalitha. 2 Abantu bakhona basiphatha ngomusa ongajayelekanga. Basemukela kuhle sonke, basibasela umlilo wekhanka ngokuba lalisina njalo kumakhaza. 3 UPhawuli watheza umnyaba wenkuni, wasesithi kasibase kwaphuma inhlangwana isixotshwa ngumlilo yahle yamnamathela esandleni. 4 Abahlali besihlenge bathi bebona inyoka ilenga esandleni sakhe bathi omunye komunye, “Indoda le iyisigebengu; ngoba loba isindile olwandle uKwahlulelakuhle kakumvumelanga ukuthi aphile.” 5 Kodwa uPhawuli wayithintitha inyoka wayilabhulela emlilweni yena kaze alimala lakancane. 6 Abantu babelinde okwesikhathi eside bengaboni lutho olubi lusenzakala kuye, baguqula imicabango yabo basebesithi ungunkulunkulu.

7 Eduze kwalapho kwakulepulazi lingelikaPhabhiliyu, owayeyisona sikhulu esiphethe isihlenge. Wasemukela ngesihle emzini wakhe wasihlalisa khona okwezinsuku ezintathu esiphethe kuhle. 8 Uyise wayegula elele phansi ephethwe luqhuqho lesihudo. UPhawuli wayambona, kwathi esekhulekile, wambeka izandla wamsilisa. 9 Kwathi sekwenzakele lokhu, bonke abagulayo esihlengeni beza basiliswa. 10 Basidumisa ngezipho ezinengi, kwasekusithi sesilungela ukuwela basilungisela umphako owaneleyo.

Ukufika ERoma

11 Ngemuva kwezinyanga ezintathu sangena olwandle sikhwele umkhumbi owawuchithe ubusika khona lapho. Wawungumkhumbi wase-Alekizandriya owawulesimo esilamakhanda amaphahla abonkulunkulu oKhasto loPholukhi.

12 Sakhuphukela eSirakhusi sahlala khona okwezinsuku ezintathu. 13 Sesisuka lapho sawela sayafika eRegiyumi. Ngakusasa kwaphephetha umoya weningizimu, yikho ngelanga elilandelayo sayafika ePhuthewoli.

14 Lapho safumana abazalwane abasinxusa ukuthi sihlale khona okweviki silabo. Yikho sasesidlulela eRoma. 15 Abazalwane balapho basebezwile ukuthi siyeza, yikho bahamba baze bayafika eNkundleni yase-Aphiya laseziNkantini eziNtathu besihlangabeza. Wathi ebabona lababantu uPhawuli wabonga uNkulunkulu njalo waqiniswa. 16 Sithe sesifikile eRoma uPhawuli wavunyelwa ukuhlala yedwa, elindwe ngelilodwa ibutho.

UPhawuli Utshumayela ERoma Elindiwe

17 Ngemva kwezinsuku ezintathu uPhawuli wabiza abakhokheli babaJuda. Bathi sebehlangene wathi kubo: “Bazalwane bami, loba ngingenzanga lutho olubi ebantwini bakithi kumbe olwephula imikhubo yabokhokho bethu, ngabotshwa eJerusalema nganikelwa kumaRoma. 18 Wona esengihlolile afisa ukungikhulula ngokuba ngangingelacala loba elakuphi ukuganga okwakungafanela ukufa. 19 Kodwa kwathi ngoba abaJuda bakwala lokho ngabona sekufanele ukuthi ngikhalaze kuKhesari – kungayisikho ukuthi ngasengimangalela abantu bakithi. 20 Ngalesi isizatho ngicelile ukuthi ngilibone, ngikhulume lani. Kungenxa yethemba lika-Israyeli okwenza ngibotshwe ngale iketane.”

21 Baphendula bathi, “Kasitholanga zincwadi ezivela eJudiya mayelana lawe, njalo kakho umzalwane ovela khonale oke wabika kumbe wakhuluma ulutho olubi ngawe. 22 Kodwa sifuna ukuzwa ukuthi imibono yakho ithini, ngoba siyakwazi ukuthi ezindaweni zonke abantu bakhuluma kubi ngaloluhlelo lwenkolo.”

23 Balungisa ukuhlangana loPhawuli ngelinye ilanga, kwathi ababesethekelela uPhawuli lapho ayehlala khona bababanengi okudlulayo. Kusukela ekuseni kwaze kwaba ntambama wachaza njalo wamemezela ngokuseMthethweni kaMosi lakubaPhrofethi.

24 Abanye basuthiswa yilokhu ayekutsho, kodwa abanye kabazange bakholwe.

25 Baphikisana bona bodwa basebesuka ngemva kokuba uPhawuli eseqedile ukuphetha inkulumo yakhe esithi: “Uma oNgcwele wakhuluma iqiniso kubokhokho benu aze ukhulume ngomphrofethi u-Isaya, athi:

26 “ ‘Hamba kulababantu uyekuthi, “Lizahlala lisizwa njalonje, kodwa lingaqedisisi; lizabe libona kokuphela kodwa lingabonisisi.

27 Ngokuba inhliziyo yalababantu isindikindiki; kabasezwa ngezindlebe zabo, njalo sebevale amehlo abo; ngoba bangaqabuka bebona ngamehlo abo, bezwe ngezindlebe zabo, baqedisise ngezinhliziyo zabo, baphenduke, lami ngibasilise.’

28 “Ngakho ngithanda ukuthi lazi ukuba insindiso kaNkulunkulu isithunyelwe kwabeZizwe, njalo bona bazalalela!”

29 (Ngemva kwalokhu abaJuda basuka, bephikisana bodwa kakhulu.)

30 UPhawuli wahlala khona okweminyaka emibili egcweleyo, ehlala endlini yakhe ayeyiqatshile, njalo esemukela ngesihle bonke ababesiza bezombona. 31 Watshumayela ngombuso kaNkulunkulu, wafundisa ngeNkosi uJesu Khristu ngesibindi njalo engaphazanyiswa muntu.